اسئلة تخنق؟؟؟؟؟

رخــــامـــة !!!!
فيه أسئلة بديهية مالهاش اي لزمة في الدنيا
بنتعرّض ليها كل يوم من كل الناس
خلـونـــا نشــوف أمثلة
***********
إنت في أوضتك .. على السرير وطافي النور ومتغطي
ييجي أخوك الظريف ويفتح الباب عليك ويقول : ايه ده انت هتنام ولاّ ايه ؟
(( أظن ده مش وضع الرقص !!! واضح ان انا هنام ))
***********
انتم معزومين عند ناس ورحتو لبيتهم وأول ما فتحولكوا الباب يقول ابنهم الصغير: انتوا جيتــواااااااااااااااا ؟
(( لا لسه....مش عاوز حاجه اجيبهالك و احنا جايين؟؟))
***********
والعكس : انت لابس هدومك و متأنتك و على سنجة عشرة وريحة البارفان واصله لاخر الشارع .. وخلاص بتفتح باب الشقة,, يجي حد من أهلك وينادي بصوت عالي : انت خااااارج ولاّ اييييييييييه
(( !!! لا دانا لسه راجع ))
***********
أو مثلا راكب العربية ودوّرتها وخلاص هتطلع ... يجيلك لك البواب ويخبطلك على الزجاج,, انت بكل ذوق تفتح الزجاج وتقوله : خير في حاجة؟
يقولك : انت رايح الشغل يابيه ؟
(( لا.. العربية واحشاني فقلت انزل اقعد فيها شويا))
***********
مثلا ماسك سماعة التلفون وقاعد تضغط الارقام يجي حد من أهلك ويقولك: انت هتتكلم في التليفون ؟
(( لا.. بتفرّج عليه ))
***********
مثلا : ماسك مذكرة أو كتاب وقاعد تحفظ ومتحمس (أول مره بقى) .. جه حد وقالك: هاه.. قاعد تذاكر ؟
(( تقوم رامي الكتاب و تقوله لااااااااء ))
***********
ربنا هاديك كده ... ماسك سبحة و عمال تسبّح ، يجي حد من البيت يعدي عليك ويقول: هوّه انت بتسبح ؟
(( لاء.. هفرطها و أسلقها ))
***********
ولاّ تعالــو شوفو قنواتنا واسئلتهم البديهية البايخة
برنامج اهداءات يتصل واحد يطلب أغنيه
ترد عليه ست الكوتكوته (المذيعة) بكل خفه ورشاقة : إنتا بتحب الاغنيّة ديه ولا ايه ؟
(( لا.. طالبها اخنق على نفسي ))
***********
أو مثلا في العيد
المذيع : هههههه هههههههه هههههه نتعرّف بيك
المواطن : فلان الفلاني
المذيع :هههههه هههههه هههههه بتقول ايه للأهل ههه و صحابك ههه وقرابيك هههه و للناس اللي انت مخاصمهم كمان ؟ هههههه هههههه ههههههه
المواطن : أقولهم كل عام وأنتم بخير
(( أكيد يعني مش هيقولهم البقاء لله ))
***********
,,,المذيعة الظريفـة : وياترى بقى هتعملوا ايه العيد ده هتقضوه ازاي ؟
أكيد بيبقى زيارات الأهل و الصحاب و تخرجوا تشوفوا مظاهر العيد في الشوارع و تفسحوا أولادكم ونتصل بالمعارف نعيّد عليهم و نقولهم كل سنة و انتو طيبين
(( سبتيله ايه يقوله يارخمة بقي؟ ))
***********
والأسخف بقى ... الشلل الكبير.. لما المذيعين يكلّموا الاطفال
يقول المذيع للطفل : إنت بتحب ماما وبابا ؟
(( يعني أساسي الواد لسه ما طلعلوش عرق الندالة علشان يقول لأ ))
************
و لا تبقي في عز النوم و ابوك ييجي يصحيك و بمنتهي البرود هو انت كنت نمت و لا ايه؟؟؟
لا طبعا.............كان مغمي عليا و الحمد لله انك جيت فوقتنى

اقتباس :: مثلا : ماسك مذكرة أو كتاب وقاعد تحفظ ومتحمس (أول مره بقى) .. جه حد وقالك: هاه.. قاعد تذاكر ؟
(( تقوم رامي الكتاب و تقوله لااااااااء ))

هي اسئله صحيح ما لها داعي لكن بتيجي كده عفويه

بس اخينا الي رمى الكتاب ده بيتلكك وزودها شويه

تسلمي روقه

هههههههههههههههههه تسلمى ياروقه
جامدين فحت

فعلا اسأله تنقط ومفيش اكتر منها

تسلم ايديكي يا روقه

نعمل ايه نموت نفسنا يعنى
نستحمل وامرنا لله

تسلم ايدك يا روقه

مثلا : ماسك مذكرة أو كتابوقاعد تحفظ ومتحمس (أول مره بقى) .. جه حد وقالك: هاه.. قاعد تذاكر ؟
(( تقوم رامي الكتاب و تقولهلااااااااء ))

هههههههههههههههههههه
وانا كمان ما هصدق وهرميه ع طوووووووووووووول

فعلا منتهى الرخامه وان كنت انا واحده من الناس فى وقت بقو ل الكلام ده
ههههههههههههههه ده انا خنيقه اوى يا ساتر

تسلمى يا روقه

ههههههههههههه
تصدقي اول مره اعرف ان احنا رخمين
بس كلنا بنسال نفس الاسئلة

اسئله منيله و تخنق

بس عادى الواحد بيرد بسزاجه برده

اصل مفيش اسئلة تانية ممكن تتقال كل شويه ومش معقوله يعني نقعد طول اليوم ساكتين
على فكره انتي ناقلة الموضوع ده ولا ايه

سؤال رخم برضه ملوش صنف الطلب

mado كتب:: هههههههههههههههههه تسلمى ياروقه
جامدين فحت

ههههههههههه ده انت اللى جامد فحت

وتسلم ايدك يا بشمهندسه على التوبيك

هى بتبقى اسئله تلقائيه بتتطلع من غير منشعر بيها

» اعرف شخصيتك من 4 اسئلة
» اسئلة حساسة جدا(حلقة نقاش ساخن)
» اسئلة صريحة - حزينة - جريئة- عاطفية - مؤلمة